ನನ್ನ (ಅ)ವಳು

ಒಂದೇ ಬಾರಿ ನನ್ನ ನೋಡಿ ಮಂದ ನಗೀ ಹಾಂಗ ಬೀರಿ
ಮುಂದ ಮುಂದ ಮುಂದಾ ಹೋದ ಹಿಂದ ನೋಡದ ಗೆಳತೀ ಹಿಂದ ನೋಡದ...........
ಗೆಳತಿ ಕಿವಿಯಲ್ಲಿ ನೀನು ಪಿಸುಗುಟ್ಟಿದ್ದು ಇದೇ ಹಾಡನ್ನಾ? ಅಥವಾ ಇದು ನನ್ನ ಭ್ರಮೆನಾ? ತಿರುಗಿ ಒಮ್ಮೆ ನಿನ್ನನ್ನ ನೋಡ್ಬೇಕು ಅನ್ನಿಸ್ತಿದೆ ಕಣೇ. ಆದ್ರೆ. ಎಲ್ಲಿ ನೀನು ತಪ್ಪು ತಿಳೀತಿಯೇನೋ ಅನ್ನೋ ಭಯ. ಆಗ್ಲೆ ಮೂರು ಸಾರಿ ಮುಗ್ಗರಿಸಿಬಿಟ್ಟಿದೀನಿ. ಇವನಿಗೆ ಕಣ್ಣು ಸರಿಯಿಲ್ಲ ಅಥವಾ ನಡೆಯೋಕೆ ಬರಲ್ಲ ಅಂತ ಯೋಚಿಸ್ತಿದೀಯಾ? ಇಲ್ವೇ ಇದು ನನ್ನ ತಪ್ಪಲ್ಲ. ದೇವರು ನಂಗೆ ಎಲ್ಲೂ ಮೋಸ ಮಾಡಿಲ್ಲ. ಇದಕ್ಕೆ ಕಾರಣ ಅವನು ನಿಂಗೆ ಕೊಟ್ಟಿರೊ ಸೌಂದರ್ಯದ ಒಡವೆ. ನಿನ್ನ ತುಟಿಯಂಚಿನ ನಗು, ಮೋಹಕ ನೋಟ,....ಸಾಕು ಸಾಕು ನಾನು ಹೇಳ್ತಾ ಹೋದ್ರೆ ನಿಂಗೆ ಜಂಭ ಬಂದುಬಿಡುತ್ತೆ.
ಇನ್ನು ಎರಡು ಹೆಜ್ಜೆ ಮುಂದೆ ಹೋದ್ರೆ ತಿರುವು ಬಂದುಬಿಡುತ್ತೆ. ಆದ್ರೆ ನನ್ನ ಜೀವನ ಆಗ್ಲೆ ತಿರುವು ಪಡ್ಕೊಂಡುಬಿಟ್ಟಿದೆ ಕಣೆ. ನಂಗೆ ಈ ತಿರುವು ನಿನ್ನ ಕೈ ಹಿಡ್ಕೊಂಡು ದಾಟೋ ಆಸೆ. ಒಮ್ಮೆ ತಿರುಗಿ ನೋಡ್ಲಾ? ನೀನು ಅಲ್ಲೆ ನನ್ನ ನೋಡ್ತಾ ನಿಂತಿದಿಯಾ ಅಂತ ಮನಸ್ಸು ಹೇಳ್ತಿದೆ. ಅಮಿತಾಬ್ ತರ ಒಮ್ಮೆ ಹಾಡಿ ನಿನ್ನ ಒಲಿಸಿಕೊಳ್ಳಲಾ?

ಕಭೀ ಕಭೀ ಮೆರೆ ದಿಲ್ ಮೆ ಕಯಾಲ್ ಆತಾ ಹೈ...
ತುಜೇ ಜಮೀ ಪೆ ಬುಲಾಯಾ ಗಯಾ ಹೈ ಮೇರೆ ಲಿಯೆ...

ಉಹ್ನುಂ ಇದು ಹೇಳೋಣ ಅಂದ್ರೆ ಆ ಸಿನೆಮಾದಲ್ಲಿ ಅಮಿತಾಬ್ ಗೆ ಅವಳು ಸಿಗೋದಿಲ್ಲ. ಅದಕ್ಕೆ ನಿನ್ನನ್ನು ಕಳ್ಕೊಳೊ ಭಯ. ನಿನ್ನ ಪಡ್ಕೊಳೋಕ್ ಮುಂಚೆನೆ ನಿನ್ನ ನನ್ನವಳು ಅನ್ನೋ ತರ ಯೋಚಿಸ್ತಿದೀನಿ. ಕಳ್ಕೊಂಡು ಬಿಡ್ತಿನೇನೋ ಅನ್ನೋ ಭಯ ಬೇರೆ. ತಿರುವು ದಾಟೋ ಮುಂಚೆ ಹಿಂತಿರುಗಿ ಒಮ್ಮೆ ನೋಡ್ಲಾ? ನಿನ್ನ ಹೆಜ್ಜೆ ಸದ್ದು ಕೇಳಿಸ್ತಾ ಇದೆ. ಆದ್ರೆ ಅದರ ಸಪ್ಪಳ ನನ್ನಿಂದ ದೂರಾಗ್ತಾ ಇದೆ ಅನ್ನಿಸ್ತಿದೆ.

ಓ ಲಲನೆ, ಸುಮ ನಯನೆ
ನಿಲ್ಲು ನುಡಿ ಕೇಳ್ ಚಂದಿರ ವದನೆ!!
ನಾ ತಳೆದಿಹೆ ನಿನ್ನಲ್ಲಿ ಬಲು ಘನ ಪ್ರೇಮ
ಒಲವಿಂದಲಿ ನೀ ತಿಳುವೈ ಈ ಮನವ!!

....ಧಾರೇಶ್ವರರ ತರಹ ಹಾಡಿ ಬಿಡಬೇಕು ಅನ್ನಿಸ್ತಿದೆ. ಆದ್ರೆ ನನ್ನಲ್ಲಿ ಆ ಶಕ್ತಿಯಿಲ್ಲ. ನನ್ನ ಹೆಂಬೇಡಿ ಅಂತ ಅಂದ್ಕೋಬೇಡ. ಬವರವಾದರೆ ಹರನ ವದನಕೆ ಬೆವರ ತಹೆನ್ .. ಅಂತ ಹೇಳದೇ ಇದ್ರು ನನಗೆ ಹೆದರಿಕೆ ಅನ್ನೋದು ಇವತ್ತು ಬಿಟ್ಟು ಇನ್ಯಾವತ್ತು ಆಗಿದ್ದೇ ಇಲ್ಲ. ಯಾಕಂದ್ರೆ ಪುಸ್ತಕನೇ ಮುಟ್ಟದೇ ಪರೀಕ್ಷೆ ಬರೆಯೋಕೆ ಹೋಗಿದ್ದಿದೆ ಚೂರು ಭಯ ಇಲ್ಲದೆ. ಆದ್ರೆ ಇವತ್ತು....
....ತತ್ ಈ ಹಾಳು ಮೊಬೈಲ್ ಈಗಲೇ ಹೊಡ್ಕೋಬೇಕಿತ್ತಾ. ಓಹ್ ನಾನೆಲ್ಲಿದಿನಿ. ಆಗ್ಲೇ ಆ ತಿರುವು ದಾಟಿ ತುಂಬಾ ಮುಂದೆ ಬಂದಿದಿನಿ. ನೀನು ಯಾವ ಕಡೆ ಹೋದಿ ನನ್ಗೆ ಗೊತ್ತಿಲ್ಲ. ನಿನ್ನ ಹೆಸರು ಉಹ್ನುಂ ಗೊತ್ತಿಲ್ಲ. ಮತ್ತೆ ಆ ಹಾಡು..... ಆ ಹಾಡು ನೀನು ಹಾಡೋಕೆ ಹೇಗೆ ಸಾದ್ಯ? ನಾನು ಗೋವಾದಲ್ಲಿದಿನಿ ಅಂತನೂ ಮರ್ತೋಗಿತ್ತು ನೋಡು. ಆದ್ರೂ ನಿನು ನನ್ನ ತರ ಗೋವ ಅತಿಥಿ ಯಾಕಾಗಿರಬಾರದೂ????? ಮತ್ತೆ ನನ್ನ ಬಾಸ್ ಬಿ ವಿ ರಾಯರ ಆ ಮೊಬೈಲ್ ಕಾಲರ್ ಟೋನ್ ರಿಂಗಣಿಸುತ್ತಿತ್ತು

ಮುಂದ ಮುಂದ ಮುಂದಾ ಹೋದ ಹಿಂದ ನೋಡದ ಗೆಳತೀ ಹಿಂದ ನೋಡದ...........
ನಾನು ಸಂಪೂರ್ಣ ವಾಸ್ತವಕ್ಕೆ ಬಂದಿದ್ದೆ.
ಮೆ ತೊ ಚಲಾ ಜಾವೂಂಗ
ವಾಪಸ್ ನ ಆವೂಂಗಾ
ಮೆ ತೆರೀ ಗಲಿಯಾಂ ಚೋಡಕೇ ಏ ಏ ಏ ಎನ್ನುತ್ತಾ ಗೋವಾದಿಂದ ಹೊರಬಿದ್ದೆ....